MANILA, Philippines - Isa sa kinasasabikang racing festival taun-taon ay gagawin ngayong Sabado at Linggo sa Santa Ana Park sa Naic, Cavite.
Ang 20th Metropolitan Association of Race Horse Owners (MARHO) Cup Championships ay katatampukan ng limang malalaking stakes races na sasalihan ng mga tinitingalang kabayo na pag-aari ng mga kasapi ng asosasyon.
Sa Linggo ang tampok na selebrasyon at ang mga malalaking stakes races na gagawin katuwang ang San Miguel Beer ay ang Classic, 3YO Colt at Filly Mile race, Juvenile Colts at Fillies at ang Sprint race katuwang ang Philippine Charity Sweepstakes Office (PCSO).
Sa mahabang 2,000-metro ang distansya ng Classic na bukas para sa mga kabayong edad apat na taong gulang pataas.
Pitong kabayo ang nagpatala sa karera sa pangunguna ng premyadong kabayo sa mga nagdaang taon na Hagdang Bato.
Ang kabayo na pag-aari ni Mandaluyong City Mayor Benhur Abalos ay naghahanap ng kanyang unang panalo sa taon at kung mangibabaw sa karerang ito ay malamang isali rin sa Presidential Gold Cup sa Disyembre.
Kasali rin sa karerang ito ay ang Kanlaon, King Bull, Hot And Spicy, Biseng Bise, Manalig Ka at Marinx.
Limang kabayo naman ang magsasagupa sa 3YO Mile race na Gentle Strength, Hook Shot, Sky Hook, Super Spicy at Shintaro’s Speed.
Ang Sky Hook ay kampeon ng PCSO Grand Derby at sumali rin sa idinaos na Triple Crown Championship para paniwalaan na magiging handa sa karerang gagawin sa 1,600-metro distansya.
Nasa 1,300-metro ang distansya sa dalawang 2-year old races at magsusukatan sa colts ang Bite My Dust, Dewey Boulevard, Lucky Toni, Stark at Underwood habang mga kasali sa fillies ay ang Bowties and Charms, Incomparable, Port Angeles, Real Flames at This Time.
Galing ang Underwood sa panalo sa 2015 Philracom Juvenile Cots Stakes race noong nakaraang buwan sa mas mahabang 1,400-metro at ito ang sasandalan ng connections para makuha ang panalo.
Sa kabilang banda, hindi malayong paboran ng bahagya ang Port Angeles na nangibabaw sa Japan Racing Association (JRA) Stakes race noong Setyembre.
Sa 1,100-metro gagawin ang labanan sa Sprint race at ang mga kasali rito ay ang Barcelona, Cat’s Silver, Ik Hou Van Jou, Nemesis at Never Cease.
Isa pang stakes race na itataguyod ng Philippine Racing Commission (Philracom) ang kukumpleto sa masaganang aksyon.
Ang Philracom Ambassador Eduardo M. Cojuangco Jr. Cup na katatampukan ng mga local at imported horses ang gaganapin din at itatakbo sa 2,000-metro.
Ang mga kasali rito ay ang Pugad Lawin, Low Profile, Penrith, Messi at Tap Dance sa mga locals at ang Strong Champion, Silver Sword, Bentley at Eugene.