OAKLAND, California — Nag-init ang mga kamay ni Klay Thompson at kumayod ng 40 points, habang ipinagpag ng Golden State Warriors ang malamya nilang panimula para gibain ang Indiana Pacers, 117-102.
Naiposte ng Warriors ang kanilang pang-limang sunod na panalo.
Naglista si Thompson ng 14-of-25 shots, kasama ang 6-of-11 sa 3-point range, samantalang nagdagdag si Stephen Curry ng 21 points at season-high-tying 15 assists para sa Warriors (28-5).
Ito ang ika-13 sunod na panalo ng Warriors sa kanilang tahanan.
Lumamang ang Pacers ng 11 points sa first half bago nakatabla ang Warriors sa 50-50 sa halftime.
Binuksan ng Golden State ang third quarter mula sa pamamagitan ng 14-1 atake at hindi na nilingon pa ang Indiana hanggang sa fourth period.
Nagtala si Solomon Hill ng 21 points kasunod ang 16 ni David West sa panig ng Pacers.
Sa Atlanta, kumamada si guard Jeff Teague ng 25 points para ihatid ang Hawks sa 96-86 panalo sa Memphis Grizzlies sa sagupaan ng dalawang NBA contenders.
Nakamit ng Hawks, may best record sa Eastern Conference sa kanilang 27-8 baraha bunga ng ikaanim na sunod na panalo, habang nalaglag ang Grizzlies (25-10) sa ikatlong puwesto sa Western Conference.