MANILA, Philippines - Magpapatibayan ngayon ang Perpetual Help Altas at ang host Jose Rizal University Heavy Bombers sa pagkapit sa ikatlong puwesto sa 90th NCAA men’s basketball tournament sa The Arena sa San Juan City.
Sa alas-4 ng hapon itinakda ang bakbakan at ang mananalo ay didikit sa Arellano na may 9-3 baraha.
Magkasalo sa 8-4 karta ang Altas at Heavy Bombers at ang mamalasin ay bababa sa ikaapat na puwesto kasosyo ang St. Benilde Blazers (8-5).
Naging mainitan ang unang pagtutuos ng dalawang koponan at pinalad ang host school na maitakas ang 62-61 panalo sa Altas mula sa follow-up ni Dave Sanchez.
Mataas din ang morale ng tropa ni coach Vergel Meneses dahil may dalawang sunod na panalo sila na kinuha sa Emilio Aguinaldo College Generals at Lyceum Pirates sa pagharap sa Mapua.
Hindi naman padadaig ang Altas na kasalukuyang nasa three-game winning streak kontra sa Pirates, Letran Knights at Arellano Chiefs.
Patuloy ang kinang ng paglalaro nina Juneric Baloria, Harold Arboleda at Earl Scottie Thompson pero ang nagpapalalim sa arsenal ng bataan ni coach Aric del Rosario ay ang pagganda ng laro ng ibang inaasahan tulad ni Justine Alano.
Unang magtatapat sa ganap na alas-2 ng hapon ay ang pagkikita ng Lyceum at Mapua Cardinals.
May 5-7 karta ang Pirates pero talunan sila sa huling tatlong laro at lima sa huling anim na laro.