MANILA, Philippines - Isang panalo na lamang ang kailangan ng Lady Troopers at ng Rising Suns para maitakda ang kanilang best-of-five championship series.
Ito ay matapos talunin ng No. 1 Philippine Army ang No. 4 Philippine Air Force, 24-26, 25-19, 25-20, 25-19, at gibain ng No. 3 at nagdedepensang Cagayan Valley ang No. 2 PLDT Home Telpad, 25-11, 16-25, 25-14, 25-20, sa semifinals series ng Shakey’s V-League Season 11 Open Conference kahapon sa The Arena sa San Juan.
Kinuha ng Lady Troopers at ng Rising Suns ang 1-0 bentahe sa kani-kanilang best-of-three semifinals showdown.
Ang kanilang tagumpay sa Game Two sa Linggo ang tuluyan nang mag-aayos sa kanilang titular war.
Umiskor naman si dating Far Eastern University standout Rosemarie Vargas ng 18 points, habang may 16 si Janine Marciano, 12 si Aiza Maizo at 11 si Pau Soriano para sa tagumpay ng Cagayan.
Nagtumpok sina Ginie Sabas at Joanne Bunag ng pinagsamang 24 hits para ibigay sa Army ang panalo, habang may 4 hits lamang si top hitter Rachel Ann Daquis.
Tumapos sina Sabas at Bunag na may 14 at 10 points, ayon sa pagkakasunod, para suportahan sina Jovelyn Gonzaga, Mary Jean Balse at Nerissa Bautista.
Humataw si Gonzaga ng 18 hits kasunod ang 13 ni Balse at 11 ni Bautista.
Matapos isuko ang first set sa Air Spikers ay inangkin ng Lady Troopers ang sumunod na dalawang sets para sa kanilang 2-1 abante.