Almazan nagbida sa 5th win ng Letran kontra sa Lyceum

MANILA, Philippines - Si Raymond Almazan na ang sinasabing pinakadominanteng sentro nga­yong 89th NCAA season.

Ipinakita ito ng 6-foot-7 na tubong Bataan nang ku­molekta ng 19 points, 17 rebounds at 3 shotblocks sa 61-53 paggiba ng Letran College kontra sa Lyceum sa  first round ng 89th NCAA men’s bas­ketball tournament ka­hapon sa The Arena sa San Juan.

Matapos iposte ng Knights ang isang 12-point lead, 46-34, sa third period, nakadikit naman ang Pirates sa 52-55 agwat galing sa jumper ni Mark Anthony Francisco sa 1:45 ng fourth quarter.

Sa likod nina Almazan, pinsan ni PBA player Kerby Raymundo ng Barangay Ginebra, at rookie Rey Nambatac, muling na­kalayo ang Letran laban sa Lyceum.

“Hopefully, makapagbigay ako ng championship sa Letran bago ako magpa-draft sa PBA this year,” wika ng 23-anyos na si Almazan.

Bago ito, nakuha ng Pi­rates ang first half, 32-31, bago ihulog ng Knights ang isang 14-3 bom­ba para ilista ang ma­la­king 46-34 kalamangan sa third period.

Binanderahan naman ni Issah Mbomiko ang Ly­ceum mula sa kanyang 15 points kasunod ang 11 ni John Azores.