Aguilar sa Gin Kings

MANILA, Philippines - Maglalaro ang 6-foot-9 na si Japeth Aguilar at 6’8 Fil-American na si Jay Washington sa magkaibang koponan.

Ito ay matapos aprubahan kahapon ni PBA Commissioner Chito Salud ang isang five-player, four team trade.

Nakuha ng Barangay Ginebra ang 26-anyos na si Aguilar mula sa Globalport bilang kapalit ni 6’8 rookie center Yousif Taha at isang 2013 first round draft pick.

Ang dating Ateneo Blue Eagle ay makakasama sa Gin Kings nina LA Tenorio, Jayjay Helterbrand, Mark Caguioa at Kerby Raymundo.

Sa pagpapakawala kay Aguilar, kinuha ng Batang Pier si Washington buhat sa Petron Blaze Boosters kapalit ni 6’7 rookie Jayson Deutchmann.  Mali-ban kay Washington, nasambot din ng Batang Pier ang 2016 at 2017 second draft pick ng Petron.

“Jaywash and Taha fill the void and weaknesses of Globalport in the post,” sabi ni Globalport team owner Mikee Romero kina Washington at Taha. “Also, we can use the pick we got to rebuild our team.”

Si Washington ay makakasama nina two-time PBA Most Valuable Player Willie Miller, Sol Mercado at Gary David sa kampo ng Globalport.

Nasangkot naman ang Barako Bull nang kunin si Elmer Espiritu mula sa Ginebra kapalit ng kanilang 2013 first round pick.