Dear Vanezza,
Ako po’y 26 years old na. Sa edad kong ito ay hindi ko pa naranasang manligaw at magka-gf. Six years old po ako nang mahulog sa puno. Sinamang palad akong bumagsak sa isang nakausling matalim na bagay na tumama sa aking pagkalalaki. Akala ng mga magulang ko ay namatay na ako. Pero sa palagay ko’y mabuti pa nga siguro kung namatay ako para hindi ako namomroblema ngayon. Hindi na naikabit ang aking ari at ‘di na ako puwedeng mag-function nang normal sa sex. Nawalan na ako ng kapabilidad para bumuo ng buhay. Balewala sana sa akin dahil bata pa ako at walang muwang. Pero nang nagbibinata na ako ay na-realize ang malaking kakulangan sa aking pagkalalaki. Nagkakaroon ako ng sexual urge pero hindi ko mai-express dahil sa aking handicap. Wala nang silbi ito maliban sa daanan ng ihi. Maraming babaeng nagkakagusto sa akin at napagkakamalan akong bakla. Hindi ko lang masabi sa kanila ang aking problema dahil nakakahiya. Kung minsan ay naiisip kong wakasan ang aking buhay. Sana ay matulungan mo ako. - Totoy
Dear Totoy,
Alam kong mahirap ang iyong kalagayan pero hindi dapat maging dahilan iyan para ikaw ay magtangkang wakasan ang iyong buhay. Ang silbi ng isang tao’y hindi lang naman sa pag-aasawa at pagkakaroon ng pamilya. Alam kong may kakayahan kang magdadala sa iyo sa tagumpay kung gagamitin mo. Yun ang tuklasin mo sa iyong sarili. Huwag mong isipin ang sasabihin ng ibang tao sa iyo porke’t hindi ka nanliligaw. Bigyan mo ng kahulugan ang iyong buhay at gamitin mo ang iyong talentong kaloob ng Diyos.
Sumasaiyo,
Vanezza