Dear Vanezza,
Tawagin mo na lang akong Merly, 28. Noong nag-graduate ako sa college ay may bf ako. Mahal na mahal namin ang isa’t isa. Pero nagtrabaho siya sa ibang bansa at nawalan kami ng komunikasyon. Ngayon ay may bago na akong bf. Walong buwan na kami. Mahal ko rin siya pero hindi katulad ng pagmamahal ko sa una kong bf. Noong isang buwan dumating mula sa Amerika ang dati kong nobyo at nakikipagbalikan sa akin. Naguguluhan ako dahil mahal na mahal ko pa rin siya. Pero paano ang isa kong boyfriend na umaasang makakatuluyan ko? Tulungan mo akong magpasya.
Dear Merly,
Kung hindi ka pa committed at hindi pa naitatakda ang inyong kasal ay puwede ka pang magbago ng isip. Mag-usap kayong mabuti ng bf mo at sabihin ang katotohanan. Mas masama na ipagpatuloy ang inyong relasyon na may pagkukunwari. Makabubuti na maaga pa lang ay tapusin na ang inyong relasyon kung talagang may minamahal kang iba. Alalahanin mo na kinabukasan mo ang nakataya.
Sumasaiyo,
Vanezza