Dear Vanezza,
Ang problema ko po ay tungkol sa dalawang lalaking nagpapatibok ng aking puso. Si Leo po ang una kong minahal simula pa noong high school kami. Naging masaya ang aming pagsasama pero nakipag-break din ako sa kanya. At dito nanligaw sa akin si Aries na ginamit ko para malimutan ang sakit ng paghihiwalay namin ni Leo. Hanggang ngayon ay kami pa rin ni Aries pero nanligaw ulit si Leo at sa hindi maipaliwanag ay sinagot ko siya. Bagay na hindi ko pinagsisihan. Mahal ko silang dalawa. Dapat ko bang ipagtapat sa kanila na dalawa sila sa puso ko? Hindi kaya nila ako iwanan at saktan sa bandang huli? - Gemini
Dear Gemini,
Kapag nagkabukuhan ay malamang pareho silang mawawala sa buhay mo. Hindi ka puwedeng mamangka sa dalawang ilog. Dapat pakasuriin mo silang dalawa kung sino ang mas matimbang at nakakaangat ng katangian at yun ang piliin mo. Hindi puwedeng sabay. Ilagay mo ang iyong sarili sa kanilang sitwasyon, papayag ka bang maraming babae ang lalaking minamahal mo? Siyempre hindi. Natural na masasaktan ang sinumang hihiwalayan mo pero mabuti nang mangyari iyan habang maaga para mas madaling maghilom ang sugat.
Sumasaiyo,
Vanezza