MANILA, Philippines — Pagiging matatag at puno ng pag-asa sa gitna ng mga pagsubok ang mensaheng ibinahagi ng pop ballad royalty na si Erik Santos sa kanyang bagong awitin na Sagot Sa Aking Dasal.
“Para sa lahat ng nagtiyaga upang maabot ang kanilang pangarap, ang awiting ito’y para sa inyo. Ito ang kwento ng pagsusumikap para maabot ko ang pangarap ko kasama kayo,” saad ni Erik sa kanyang Instagram post.
Isinulat ni Yeng Constantino ang Sagot Sa Aking Dasal habang iprinodyus ito ni ABS-CBN Music creative director Jonathan Manalo.
Samantala, naging matagumpay ang concert ni Erik na Milestone kung saan ipinagdiwang niya ang ika-20 anibersaryo sa industriya na naganap sa SM Mall of Asia Arena noong nakaraang taon.
Hinirang din ang nasabing event bilang Best Major Concert (Male) sa naganap na 36th Aliw Awards.
Unang nakilala si Erik nang manalo siya sa Star in a Million season 1 noong 2003. Patuloy niya pinahanga ang publiko sa iba’t ibang hit songs niya tulad ng Pagbigyan Muli, I’ll Never Go, at Bakit Ba Iniibig Ka.
Nakatanggap din siya ng mga parangal mula sa Awit Awards, FAMAS, at PMPC Star Awards for Music at kinilala bilang king of Pinoy teleserye theme songs.
Pakinggan ang bagong single ni Erik na Sagot Sa Aking Dasal na available sa iba’t ibang digital streaming platforms.