CEBU, Philippines - Napanalipdan ni ALA Boxing Gym fighter Mark ‘Machete’ Bernaldez (15-0, 10KOs) ang limpiyo niyang rekord human siya midaog pinaagi sa “unanimous decision” batok ni Christian ‘Bicolano Lastikman’ Abila (12-15, 4KOs) sa main event sa ALA Promotions-Cobra Energy Drink ‘Tunay na Lakas Boxing’ sa miaging gabii didto sa Dumaguete City Hall quadrangle sa Dumaguete City, Negros Oriental.
Human sa unom ka sunod-sunod niyang knockout winning streak, ang 22-anyos nakasugat og lisud nga hagit gikan ni Abila, kinsa misukol sab og binayloay og kumo sa sayong bahin sa away.
Pabor sa kasinatian si Abila, apan si Bernaldez migamit sa iyang abilidad ug kapaspas aron modaog sa puntos.
Sa supporting bout, laing ALA Gym fighter nga si Brian ‘Buhawi’ Lobitania (9-0, 7KOs) mipaundang ni Renante Suacasa (6-13, 1KO) sa fourth round.
Sa undercards, si Jonas Sultan mipukan ni Andrew Palas, si Crispin Parba mipatumba ni Elmer Colve, si Jess Waminal mi-TKO ni Alvin Sibugan. Midaog sa puntos si Jesson Horteza batok ni James Paul Talaman, si Junder Gregorio midaog batok Jamjam Ungon ug si Michael Estrella midaog pinaagi sa “unanimous decision” batok ni Noel Rosa. (BANAT NEWS)