CEBU, Philippines - Kondisyon ug nagpanikad na si WBO minimumweight champion Merlito 'Tiger' Sabillo (21-0, 11KOs) alang
sa iyang title defense batok ni Colombian challenger Jorle Jacinto Estrada (16-6, 5KOs) sa main event sa "Pinoy Pride
XXI: When Worlds Collide" fight card sa Hulyo 13 didto sa Solaire Casino and Leisure Park sa Pasay City.
"Anaa na sa 90% ready si Merlito ug duna pa siya'y duha ka semana ang nahabilin," matud pa ni ALA chief
trainer Edito Villamor.
"Mao ni iyang una nga title defense ug inspired kaayo siya modepensa sa iyang bakus atubangan sa iyang mga
kababayan."
Si Sabillo nakahuman na og kapin 100 ka rounds sparring batok sa iyang mga ALA Gym stablemates nga
sila si Jerson Mancio, Lito Dante, Kim Galon, Ryan Canillas, Engelbert Moralde ug undefeated OPBF super flyweight
champion Arthur Villanueva.
Ang garbo sa Toboso, Negros Occidental milabni sa bakanteng WBO belt pinaagi sa eight round TKO nga
kadaugan batok ni Colombian Luis De La Rosa niadtong Marso 9 didto sa Coliseo San Vicente sa Colombia.
"Mas grabe akong training run kumpara sa kadtong nangandam pa ko para sa akong world title fight. Gusto
gyud ko og impressive nga kadaugan ning higayona," matud ni Sabillo.
Ang 29-anyos nga si Sabillo sobra pa og lima ka libras sa 105-limit, apan kompiyansa ra ang iyang kampo nga
makuha niya ang timbang sa dili pa ang away.
Si Sabillo uban ni Villanueva ug kanhi two-time world title challenger AJ 'Bazooka' Banal molarga paingon sa
Manila sunod semana adto tiwason ang ilang ensayo.
Si Villanueva (21-0, 11KOs) mosuway pagsakmit sa WBO Asia-Pacific super flyweight title batok ni
Mexican Arturo 'Fuerte' Badillo (21-4, 19KOs), samtang si Banal (28-2, 20KOs) makigharong ni Mexican Abraham
Gomez (18-7, 9KOs). (BANAT BALITA)