NEW YORK — Nang nilisan ni Jalen Brunson ang laro sa first period dahil sa right foot injury ay hindi na siya inaasahang maglalaro sa second half.
Ngunit bumalik sa aksyon si Brunson at humugot ng 24 sa kanyang 29 points sa second half para tulungan ang Knicks sa 130-121 paggdaig sa Indiana Pacers sa Game Two at kunin ang 2-0 lead sa kanilang Eastern Conference semifinals.
“He’s a great leader, so I think the players all have respect for that, when a guy goes out and is willing to give whatever he has, and so that says a lot about him,” ani coach Tom Thibodeau kay Brunson.
Kumamada si OG Anunoby ng career playoff-high 28 points para sa New York ngunit nagkaroon ng left hamstring injury sa third quarter at hindi na nakabalik.
Nag-ambag si Donte DiVincenzo ng 28 points at tumipa si Josh Hart ng 19 points, 15 rebounds at 7 assists.
Pinamunuan ni Tyrese Haliburton ang Indiana sa kanyang 34 points, 9 assists at 6 rebounds.
Dadalhin sa Indiana ang Games Three at Four.
Ipinoste ng Indiana ang 10-point lead, 73-63, sa halftime hanggang bumalik si Brunson para ibigay sa New York ang 84-79 bentahe.
Nauna nang kumonekta ng triple si Brunson para sa 24-13 abante ng Knicks sa first quarter bago nagpalabas dahil sa kanyang right foot injury.