CEBU, Philippines — Giunhan sa Boston Celtics ug Oklahoma City Thunder ang tagsa-tagsa nila ka mga karibal sa best-of-seven NBA second-round playoff series kagahapong adlawa.
Didto sa TD Garden, ang Celtics yanong mikastigo sa Cleveland Cavaliers, 120-95, ubos sa pagpangu nilang Jaylen Brown ug Derrick White pagsikad sa ilang Eastern Conference semifinals.
Si Brown mipaulbo og 32 puntos samtang si White milansang og pito ka 3-pointers sa iyang 25 puntos alang sa Celtics, nga naglaraw mokulit og record nga 18 ka kampiyonato sa NBA.
Ang laing bitoon sa Boston nga si Jayson Tatum nakamaneho pagpugnit og 18 puntos bisan og mipasud lamang og pito sa 19 niya ka itsa.
Si Donovan Mitchell mipabuto og 33 puntos, samtang sila si Evan Mobley ug Darius Garland nagkumboya'g 31 puntos apan nakawang ang ilang paningkamot alang sa Cavs.
Didto sa OKC, ang Thunder nanglimbasog usa sa wala pa pioga si Luka Doncic ug ang Dallas Mavericks, 117-95, pag-arangkada sa kaugalingon nilang serye sa West.
Si Shai Gilgeous-Alexander ang bida sa Thunder bitit ang 29 puntos, siyam ka rebounds ug siyam sab ka assists inabagan nilang Chet Holmgren ug Jalen Williams nga nagkumbinar og 37 puntos.
Si Kyrie Irving maoy nangu sa pilderong Mavs uban ang 20 puntos samtang si Doncic, nga nalimitahan ang pagka-agresibo kay nayayay ang tuhod, nakahipos og 19 puntos bisan og naka-igo lamang og unom sa 19 niya ka mga tira.