CEBU, Philippines — Si Denver Nuggets All-Star guard Jamal Murray gipahamtangan og makabungog nga $100,000 nga multa sa NBA kagahapong adlawa.
Mao kini ang silot sa liga batok ni Murray tungod sa paglabay niini og daghang mga butang ngadto sa usa ka game official.
Apil sa dili maayong gibuhat ni Murray mao ang pag-itsa og heating pad ngadto sa usa ka reperi, nga nahitabo atol sa 106-80 nga kapildihan sa Nuggets batok sa Minnesota Timberwolves sa Game 2 sa ilang best-of-seven NBA Western Conference semifinal series niadtong Martes didto sa Ball Arena sa Denver, Colorado.
Si Minnesota coach Chris Finch mihulagway sa gibuhat ni Murray nga kulba kaayo ug dili makiangayon.
Sa kasamtangan, ang Wolves nagkupot og 2-0 nga bentaha sa ilang serye nga molabyog didto sa Minnesota alang sa Games 3 ug 4.
Ang 27-anyos nga si Murray dunay average nga 21.2 puntos, 6.5 assists, ug 4.1 rebounds matag duwa uban sa Nuggets ning season.