CEBU, Philippines - Mangahas si one-time world title challenger Virgilio 'Maton' Silvano (17-3-1, 10KOs) sa Omega Boxing Gym pagsakmit sa Philippine light flyweight title atubangan sa iyang katagilungsod sa iyang pakigbatok ni Mark Anthony Florida (9-3, 4KOs) sa Bukidnon ugma sa gabii didto sa Dalaguete Sports Complex.
Kini ang pagbangon ni Silvano human mapilde ngadto ni Japanese champion Katsunari Takayama atol sa ilang IBF minimumweight title showdown niadtong Disyembre 3 didto sa Bodymaker Coliseum sa Osaka, Japan.
"Sugod gyud ko sa uno human ko mapilde. Chance nako ni nga ibalik ang kompiyansa pinaagi sa pag-knockout niya (Florida)," matud pa ni Silvano atol sa press conference kagahapon didto sa Omega Gym.
Sa supporting main event sa maong fight card nga gipasiugdahan sa International Pharmaceuticals Inc. (IPI), ang walay pildeng si Jahleel 'Maravilla' Payao (7-0, 5KOs) makigsinukmagay ni Don-Don Jimenea (14-18, 6KOs) sa General Santos City alang sa bakanteng Philippine super flyweight title.
Laing Omega fighter nga si Charlie Pucdol (5-1, 4KOs) mopakita sab sa iyang abilidad batok ni Junnie Salogaol (5-6, 2KOs), samtang si Kenan Villaflor (4-0, 1KO) manalipod sa iyang limpyong rekord batok ni Richard Rosales (4-2).
Mokompleto sa maong fight card mao ang sangka nila ni Jerry Castroverde batok Juny Villacruses, Garry Rojo batok Michael Kaibigan ug Carlo Demecilio batok Prex Cabilla. (BANAT NEWS)