CEBU, Philippines - Championship experience maoy dakung bentaha sa Southwestern University (SWU) Cobras batok sa University of San Jose-
Recoletos (USJ-R) Jaguars sa ilang title showdown sa Cebu City Mayor’s Sinulog Cup 2014 Inter-Collegiate Basketball Tournament
karong gabii diha sa Cebu Coliseum.
Sa ilang taktakay'ng kampiyonato nga gitakda sa alas-6:30 sa gabii, ang Cobras ug Jaguars dili lang magsangka sa korona, apan
lakip na usab sa P50,000 nga ganti ning upat ka adlaw nga torneyo nga gipaluyohan sa Cebu City Sports Commission (CCSC).
Ang Cebu Schools Athletic Foundation Inc. (CESAFI) champion University of the Visayas (UV) Green Lancers ug ang
University of San Carlos (USC) Warriors maoy mag-ilog alang sa ikatulong pwesto sa alas-5 sa hapon.
Gawas sa ilang beteranong local roster, mas nakabentaha sab ang Cobras sa imports nga silang Landry Sanjo ug Fabrice Siewe
nga maoy hinungdan ilang nabaslan ang UV atol sa Southern Islands championship aron maoy morepresentar sa Sugbu didto sa PCCL
Final Four sa Manila.
Ang Cobras pagalig-onan sab sa mga local players nga silang Monbert Arong, Mark Jayven Tallo, Adams Mohammed, Bernie
Bregondo ug Daryl Goloran.
Ang Jaguars sa laing bahin, mosandig sab sa ilang rebounding ug defensive import nga si Quentin Lozoladio ug mga lokal nga
silang James Regalado, Fletcher Galvez, Edmundo Bayhonan, Kyle Lajato ug Renzo Senining, anak ni Jaguars team manager Raffy
Senining.
Sa laing bahin, gilubong sa Lancers ang Warriors sa ilang non-bearing game, 84-66. (BANAT NEWS)