CEBU, Philippines - May kahigayonan na sab si ALA Boxing Gym fighter Jerson 'Smooth Operator' Mancio (18-3-3, 9KOs) nga mahimong regional champion sa dihang iyang harungon ang Japanese fighter nga si Naoya Inoue (4-0, 3KOs) alang sa OPBF light flyweight title ugma didto sa Kokugikan sa Tokyo, Japan.
Kini ang ikaduhang higayon ni Mancio nga mosuway pagsakmit sa OPBF belt human siya napilde ni Ryo Miyazaki niadtong Oktubre didto sa Osaka, Japan.
Human sa iyang kapildihan batok sa laing Hapon nga si Junichi Ebisuoka, ang 26-anyos nga si Mancio nakabangon ug mihimo'g five-fight winning streak lakip na ang pagsakmit niya sa Philippine title human niya gipakamang sa fifth round si Charlie Cabilla didto sa Mandaue City Plaza Square.
Sa labing uwahi niyang sangka, si Mancio midaog pinaagi sa "technical decision" batok ni Jovel Romasasa niadtong Agosto 17 didto sa Magsaysay Park sa Davao City.
Uban ni ALA trainer Edmund Villamor, si Mancio miabot na sa Japan uban ang paglaum nga makuha ang bakus.
"Nag-ensayo siya og maayo ani nga away. Hopefully naa na sa among kamot ang world title inig balik namo sa Pilipinas," matud pa ni Villamor.
Nakapabor si Mancio kun kasinatian ang hisgutan, apan dili kakumpiyansaan ang Japanese boxer ilabi na kay aduna kini knockout power. (BANAT NEWS)