CEBU, Philippines - Moulbo karon ang gipaabot nga pisikal ug kulbahinam nga title showdown tali sa Talk N’ Text Tropang Texters ug Rain or Shine Elasto Painters sa Game-1 sa ilang "best-of-seven" finals series sa PBA Philippine Cup sa Smart Araneta Coliseum. Sugdan ang lahugay sa alas-6:45 sa gabii. Ang Tropang Texters nagtinguha karon sa ilang ikatulong sunod-sunod nga All-Filipino Cup title, samtang ang Elasto Painters tinguha nga mohimo og back-to-back championship. Mismo si PBA Commissioner Chito Salud ang misaysay nga sikit ang serye ug seguradong ipabuhagay sa duha ka kampo ang tanan nilang kusog aron mahimong magmalampuson.
Tungod niini, si Salud mipahimangno sa mga referee nga moalisto aron likayan ang mga kontrobersiyal unya nga tawag. Mibahad si Rain or Shine coach Yeng Guiao nga dili nila atrasan ang mga higanteng players sa Talk N’ Text. "We will play as physical as long as the referees will allow. Referees will decide the limit of the physicality of the battle," matud pa ni Guiao sa The Philippine Star.
Sa iyang bahin, si coach Norman Black sa Talk N’ Text miingon nga dili sila mokompiyansiya bisan pa'g sila ang inilog sa maong serye.
Mobida sa Painters mao sila si Paul Lee, Jeff Chan, Chris Tiu, Gabe Norwood ug Sugbuanong si JR Quinahan. Atbangan kini sa mga beteranong magduduwa sa Texters sama nila ni Jimmy Alapag, Harvey Carey, Larry Fonacier, Jason Castro ug Ali Peek. (BANAT NEWS)