CEBU, Philippines - Andam na ang tanan alang sa 2013 edition sa "Coach A Meta-Fit Metabolic Fitness Camp" nga sugdan ugma diha sa Persimmon Plus sa barangay Mabolo, ning siyudad.
Sama sa miaging tuig, ang upat ka semana nga camp nga pangulohan ni Cebu fitness ambassador ug camp director Alan G. Choachuy, misaad og mas daling paagi sa pagpagamay sa timbang gamit ang moderno ug scientific-based nga mga ehersisyo. Gawas sa Persimmon, laing binyu sa maong fitness camp naglakip sa Parkmall ug Insular Square sa Mandaue City.
Makasinati og lain-laing matang sa ehersisyo ang mosalmot sa maong camp sama sa yoga, medicine balls, mixed martial arts, pilates, cobra, stability balls, no-ug, body weight exercise, ropes, elastic ug bands boxing.
Dili lang usab ehersisyo ug pasingot ang masinati sa mga partisipante tungod kay aduna na usab sila'y mga nutritionist ug dietitian nga mosubay ug motambag kun unsay angay ug saktong kan-on aron magpabilin ang kahimsog sa mga moapil. Ang training session sugdan sa alas-6 hangtod sa alas-8 sa gabii sa adlaw'ng Lunes, Martes, Miyerkules ug Huwebes.
Giklaro ni Choachuy nga limitado lang ngadto sa 50 ka mga partisipante ang mahimong dawaton sa maong fitness camp aron matagad og maayo ang mga entrante.
Ang registration fee nagkantidad og P3,500 alang sa 24 ka sessions o P140 matag session.
Mahimong magparehistro didto sa Sands sa Parkmall ug Admin office sa Persimmon Plus.
Alang sa dugang mga pangutana, mahimong motawag sa numero 0932-884470 o 4069267.(BANAT NEWS)