CEBU, Philippines - Tungod sa danyus nga nahimo sa bagyong Sandy didto sa East Coast sa Estados Unidos ilabi na didto sa New York ug silingang New Jersey, giuswag ang duwa tali sa host Brooklyn Nets (kanhi New Jersey) batok sa Knicks nga ipahigayon unta kagahapon didto sa Barclays Center nga usa ka paboritong estambayanan sa mga fans didto sa New York.
Lakip ang mga subways ug mga estasyonan sa tren ang gipalukapa ni Hurricane Sandy ug tungod kay lisod pagpangita og paagi alang sa mga fans sa pag-adto sa maong lugar, mihukom ang mayor sa New York nga i-uswag na lang ang duwa.
Si Mayor Michael Bloomberg sa New York mihangyo sa NBA nga i-uswag lang ang duwa sa Huwebes (kagahapon) tali sa gikahinamang sangka tali sa Knicks batok Nets ug misugot sab niini ang NBA.
“It’s a great stadium, it would have been a great game, but the bottom line is: There is not a lot of mass transit. Our police have plenty of other things to do,” matod pa ni Bloomberg atol sa usa ka news conference.
Ang Barclays Center nahimutang ibabaw sa Atlantic Avenue subway station complex diin adunay siyam ka subway lines ug ang Long Island Rail Road station nga gipalapdan isip kabahin sa usa ka bilyong dolyar aron tukoron ang maong arena.
Maoy pagtuo sa Nets nga usa kini ka dakung lugar diin makadani og fans nga motan-aw sa duwa human nila masinati nga diyotay ra kaayo ang motan-aw sulod sa pipila ka tuig ang milabay nga didto sila sa New Jersey.
Ning pag-uswag sa duwa ngadto sa laing adlaw, nagkanayon ang point guard sa Nets nga si Deron Williams
“We’re disappointed that we can’t play, but there’s a lot more important things going on right now, a lot of people displaced from their homes, a lot of people lost loved ones. So in the grand scheme of things, a basketball game really doesn’t mean much right now.”
Sumala pa usab ni Williams “I think it’d be hard for a lot of people to even get to the game in the first place, with public transportation being shut down. I guess it makes sense to not have the game.”
Ang Knicks gikatakdang mobukas sa ilang season karong adlawa didto sa ilang korte batok sa Miami Heat samtang ang Nets maoy mo-host sa Toronto Raptors ugma. (GGM)(BANAT NEWS)