CEBU, Philippines - Pabiling wala gihapo'y pilde ang UTASSCO quintet ni team owner Atty. Flor Yosores human sila mo-iskor 115-100 nga kadaugan batok sa Alfa Electrical Supply kaniadtong Martes sa gabii atol sa nagpadayong Power Forty Christmas League basketball tournament didto sa Inayawan Sports Complex.
Sa sayo pa, gilubong sa Park 'N Go Bakeshop ang Jin-jec Commercial, 111-88 samtang sa ikatulo ug kataposang duwa niadtong gabhiona, gilumsan sa Water Market ang Allyn & Sons sa iskor, 110-90.
Samtang naghupot na karon og 3-0 nga baraha ang UTASSCO aron magsolo sa liderato, wala pa gihapon makatilaw og daog ang Alfa Electrical Supply kinsa milukapa ngadto sa 0-3 nga baraha.
Miwadwad og 28 puntos si Wewe Cabrera alang sa UTASSCO samtang midughit og 22 puntos si Alex Mercado ug mitampo sab og double figures silang Atty. Yosores ug Michael Veloso sa ilang 18 ug 11 puntos, matag usa.
Nagmangtas ang team owner sa Alfa nga si Chno Kalinga human siya mopakatap og 28 puntos apan gawas kang Allan dela Rama nga mitunol og 10 puntos, wala nay laing suporta gikan sa iyang mga kauban.
Ang Jin-jec Commercial kinsa adunay 3-2 nga baraha, gipangulohan ni Joel Canete kinsa misubad og 29 puntos samtang si Titing Moniva midugang og 17 puntos ug si Roger Cabatas miamot og 10 puntos.
Si Domie Ozon maoy nangu sa 2-2 nga Water Market aron sa iyang 22 puntos kini makamugna og triple tie sa ikatulong pwesto uban sa Park 'N Go og ang Ang Tibay Mo.Parehong miamot og 19 puntos silang Vez Eleguin ug Michael Arias alang sa Water Market samtang ang Allyn & Sons gipangulohan nilang Carding Vernaiz ug Julian Capala kinsa mikabkab og 28 ug 22 puntos, matag usa.
Puntos matag usa:
First Game:
Park 'N Go (111)---Tabar 21, J. Rama 15, Misa 15, Lisondra 10, Abatayo 10, Fuentes 7, Espinosa 4, G. Rama 2, R. Rama 2
Jin-Jec Commercial (88)-- J. Canete 29, Moniva 17, Cabatas 10, Labajo 8, Canete 8, Atillo 5, Labajo 2
Second Game:
UTASSCO (115)---Cabrera 28, Mercado 22, F. Yosores 18, Veloso 11, Abarquez 9, Yu 6, Yosores 2.
Alfa Electrical (100)--- Kalinga 28, Dela Rama 10, Sandal 9, Flordeliza 9, Navares 8, Sabejon 4, Labalan 4, Filisopo 4, Abellana 3
Third Game:
Water Market (110)--Ozon 22, Eleguin 19, Arias 19, Nacional 14, Monsqueda 12, Ungria 11, Dacalos 7, Navares 6
Allyn & Sons (90)--- Vernaiz 28, Capala 22, Caumeran 15, Lawas 9, Canedo 7, Pestano 6, Plarizan 4, Mapait 2 (BANAT NEWS)