CEBU, Philippines - Plansado na ang tanan alang sa pagpahigayon sa Consolacion Fiesta Chess Festival sa Oktubre 20-21 didto sa SM City-Consolacion.
Ang duha ka adlaw nga chessfest adunay tulo ka kategoriya -- Elementary ug Secondary nga alang lamang sa taga-Consolacion ug Open.
Mosubay kini og 7-round Swiss system format.
Usa kini ka proyekto sa Youth and Sports Development Program sa Consolacion ubos sa liderato ni Mayor Teresa P. Alegado.
Ang kampiyon sa open mobulsa og P3,000 ug tropeyo, ang second placer makadawat og P2,000 ug medalya, samtang ang third placer makadawat og P1,000 ug medalya.
Mopahiluna gikan sa ikaupat hangtod sa ikanapulo nga dapit makaangkon og P200 matag usa.
Sa secondary division, gawas sa tropeyo, ang kampiyon mobulsa og P600. Mopahiluna sa ikaduha makadawat og P500 ug medalya ug ang ikatulo makaangkon og P400 ug medalya.
Ang makampiyon sa elementary mobitbit sab og tropeyo ug P500 nga ganting salapi. Ang second placer makadawat og P300 ug medalya, samtang ang third placer gantihan og P200 ug medalya.
Alang sa rehistrasyon, pakigkita lang ni Engr. Carlito Maglasang sa Municipal Eng'g. Office o sa Cansaga Barangay Chairman Peter Cabillada. Mahimo sab mokontak ni Marvin Y. Ruelan sa numero 09267352951. (BANAT)