CEBU, Philippines - Midaog dayon ang BCH Marson ubos sa pagtimon sa ilang pointguard Edlin Endrina batok sa PICPA-Hoopers ni Yoly Meso, 88-83 sa pagbukas sa Philippine Institute of Certified Public Accountants (PICPA) 2012 Christmas basketball tournament niadtong Sabado sa gabii didto sa Capitol Parish gym sa Escario st. ning dakbayan.
Gipangunayan nilang Art Flores ug Endrina ang pagtimon sa opensa sa unang duha ka kuwarter aron moposte og 49-37 nga bentaha sa halftime.
Nakasikit ang Hoopers sa second half dihang mipatuman kini og hugot nga depensa kortesiya nilang Jeremy Makinano ug Junar Torres ug gawas pa niini, nangigo usab silang Andre Tocao, Bingo Matugas ug Meso.
Nakarekober hinuon ang Marson sa tandem nilang Ryan Alejandre ug Flores nga maoy nagsalbar kanila gikan sa delikadong sitwasyon.
Si Flores mibahog og 21 aron pangulohan ang Marson, gisundan nilang Endrina ug Alejandre nga adunay 20 puntos matag usa.
Ang Hoopers gipangulohan usab ni Tocao, kinsa mipabuto og 22 puntos, si Meso midugang og 12 puntos ug silang Matugas ug Julius Makinano parehong miabuno og 10 puntos. (BANAT SPORTS)