CEBU, Philippines - Mularga paingun sa Manila sa Huwebes ang mga ALA Boxing Gym fighters aron didto tapuson ang ilang training alang sa pagrepresentar nila sa nasud sa nagsingabot nga ‘Pinoy Pride XVII: Philippines vs Mexico’ karong Oktubre 20 didto sa SM Mall of Asia Arena.
Gipangulohan ni AJ ‘Bazooka’ Banal kinsa moaway alang sa WBO bantamweight title batok ni Pungluang Sor Singyu sa Thailand, ang Team Philippines motiwas sa ilang training didto sa Manila samtang magpaabot sa pag-abot sa mga langyaw nilang kaatbang.
Laing sakop sa Team Philippines mao sila si ALA featherweight superstar Rey ‘Boom Boom’ Bautista, Jason ‘El Niño’ Pagara ug Michael ‘Bruce Lee’ Domingo.
Didto sa kaulohan, ang mga ALA Boys mopakita sa ilang kondisyon sa serye sa mga public workout didto sa SM Megamall, SM Mall of Asia ug SM Fairview.
Sama sa mga naandan nga public workout, ang ALA Promotions muhatag usab og kahigayunan sa mga boxing fans nga makighimamat sa ilang mga idolo, gawas pa niini ang pagpanghatag og libreng tickets sa usa ka trivia questions human sa public workout.
Ang "Pinoy Pride XVII: Philippines vs. The World" sa ALA Promotions gisuportahan usab sa ABS-CBN Sports.