CEBU, Philippines - Napuslan ang pagkuha sa Southwestern University (SWU) Cobras ni Benoit Mbala aron maoy motimbang kang Justine Aboude sa ilawom tungod kay iyang gitimonan ang koponan pagkulit og kulbahinam kaayong kadaugan batok sa University of the Visayas (UV) Green Lancers, 73-72 sa Game-5 aron sakmiton ang korona sa 12th Cebu Schools Athletic Foundation Inc. (CESAFI) kagabii didto sa Cebu Coliseum.
Dili lang kay ang presensiya ni Mbala maoy hinungdan sa kadaugan, apan nagbunga sab ang ilang pagpasulod kang rookie John Pajantoy, kinsa maoy nagpasiugda sa uwahing rally sa Cobras pinaagi sa iyang mga assists ngadto ni Mbala.
Nalubong og 18 puntos ang SWU Cobras sa nahabiling 7:37 sa final period, 63-45. Sa tantong kamang sa Cobras, napatabla ni Mbala ang duwa, 72-all sa katapusang 49.8 sa duwa.
Nahimo kini sa Cobras pinaagi sa ilang 10-0 run sa wala pa makaiskor pag-usab ang Lancers, 65-55 sa tirada ni Steve Cedrick Akomo. Apan hinay-hinay gihapon mikamang sa unahan ang Cobras hangtod nga nakasikit sila nga maoy nakaparatol sa Lancers, kinsa nakahimo'g daghang turnovers.
Sagunson nga siyete puntos gikan ni Mbala ang nagpabuhi sa dugo sa Cobras kansang 68-64 nga kadaugan sa Game 4 maoy nakapatabla sa serye sa 2-2 aron magpabiling buhi sa ilang kampanya sa titulo.
Napugos ang Cobras pagpasulod ni Pajantoy dihang na-foul trouble si Benito Ortuyo ug maoy nakaguba sa depensa sa Lancers.
Duha ka nagsunod nga turnovers sa Lancers maoy mitabang pagpadaog sa Cobras dihang gitawgan og offensive foul si Phil Mercader sa iya untang tuyo nga lutsan si Mbala. Nasundan pa gyud sa sayop ni Calo.
Ang split charities ni Monbert Arong sa katapusang 8.7 segundos maoy nagselyo sa kadaugan sa Cobras.
Nakapasulod unta’g three-pointer si Calo, apan wala na kini makuwenta kay aduna na lay 0.7 segundos ug nahimutang na sa "catch and shoot " nga sitwasyon.
Si Arong midugang og 10 puntos alang sa Cobras.
Si Wowie Escocio, kinsa naulian na'g diyutay sa iyang duwa maoy nangu sa Lancers sa iyang 14 puntos, samtang sila si Calo ug Akomo miamot og 13 puntos matag usa ug si John Michael Abad mihirit og 12 puntos. (BANAT)
PUNTOS MATAG USA
SWU (73) - Mbala 25, Arong 10, Goloran 9, Pajantoy 8, Nalos 8, Bregondo 4, Aboude 4, Guillena 3, Dedace 2
UV (72) - Escocio 14, Calo 13, Akomo 13, Abad 12, Saycon 8, Mercader 8, Silva 4