CEBU, Philippines - Gipukan sa GCM quintet ang Vanese Justine, 73-63 sa ilang tinaktakay nga duwa aron langkaton ang korona sa 5th F. Llamas Youth Association (FYA) niadtong Lunes sa gabii didto sa barangay Tisa gym, ning dakbayan.
Sa sayo pa, ang MBD Law Office mitumba sa Harold's Hotel, 81-78 aron mopahiluna sa ikatulo nga dapit.
Si EJohn Fernandez miiskor lang og 13 puntos alang sa GCM, apan mas palaran siya sa maong adlaw dihang iyang nadaog ang MVP trophy. Apan si Jimmy Tapdasan maoy nangu sa kadaugan nga miposa og 18 puntos, gisundan ni Tata Laborte nga adunay 13 puntos.
Si Fernandez giubanan sa Mythical Five nilang Tata Laborte, Chrissar Llegunas sa Vanese Justine, Dandan Enriquez sa MBD Law Office ug Dondon Cadungog sa Harold’s Hotel.
Ang Sportsmanship award gihatag ngadto ni Michael Palo sa GCM.
Si Duke Teves maoy nangu sa Vanese Justine sa iyang 20 puntos, samtang sila si Llegunas ug Jaz Sydiongco midugang og 12 ug 11 puntos matag usa.
Sa laing bahin, si Enriquez miburak og 35 puntos alang sa MBD Law Office, samtang sila si Nico Laborte ug Isyot Regudo miamot og 13 puntos matag usa. Si Jaime Atuel miiskor og 25 puntos alang sa Harold's Hotel.
PUNTOS MATAG USA
Unang duwa:
MBD Law Office (81) - Enriquez 35, N. Laborte 13, Regudo 13, Antiporta 11, Medalle 7, Parba 2
Harold’s Hotel (78) - Atuel 25, Cadungog 13, Cueme 12, Rupal 10, Tolentino 8, Sabalande 6, Cal 4
Ikaduhang duwa:
GCM (73) - Tapdasan 18, EJ Fernandez 13, T. Laborte 13, E. Fernandez 9, Oropa 8, Boysello 4, Avila 4
Vanese Justine (63) - Teves 20, Llegunas 12, Sydiongco 11, Jakosalem 7, Pacubas 4, Pasarello 3, Pacana 2 (BANAT SPORTS)