CEBU, Philippines - Gisalbar ni Ervin Lopena ang Cebu Landmasters dihang ilang gipakuratan ang title-favorite Goldberry Suites pinaagi sa pag-iskor og 66-61 nga kadaugan sa overtime aron maangkon ang 1-0 nga bentaha sa ilang "best-of-three" finals sa 17th Sacred Heart-Ateneo Basketball Athletic Association (SHAABAA) niadtong Domingo didto sa SHS-AdC Campus sa Canduman, Mandaue City.
Miburak og 23 puntos si Lopena aron pangulohan ang Cebu Landmasters.
Ang Goldberry unta ang nagkontrolar sa duwa sa unang tulo ka kuwarter, apan migukod ang Landmasters sa three-pointer ni Lopena. Si Gino Reyes mibagdok og laing three-pointer aron tablahon ang duwa nga miresulta sa overtime.
Sa dugang singko minutos, nagmangtas na ang Cebu Landmasters bisan wala ang duha nila ka sinaligan nga silang Kevin Villamor ug Franco Te.
Si Mangubat miamot og 17 puntos, samtang si Reyes mitampo og 13 puntos.
Ang multiple MVP awardee nga si Dave Lim maoy nangulo sa Goldberry Suite pinaagi sa iyang 13 puntos, gisundan ni Ting nga miiskor og 12 puntos.
Puntos matag usa
Cebu Landmasters (66) - Lopena 23, Mangubat 17, Reyes 13, Aldeguer 10, Chik 2, Consunji 1
Goldberry Suites (61) - Lim 13, Ting 12, Alejandro 8, Uy 7, Je. Huang 6, Tan 6, Que 5, J. Huang 2, Ong 2 (BANAT NEWS)