CEBU, Philippines - Parehong midaug ang The Insular Square ug ang Dynamic Power aron tablahon ang best-of-three semifinal series sa 1-1 nga baraha ug nakapugos og Game 3 kaniadtong Huwebes atol sa nagpadayong ika-17 nga season sa Sacred Heart Ateneo Basketball Athletic Association (SHAABAA) didto sa SHS gym sa dan Gen. Maxilom avenue, ning dakbayan.
Napakgang sa Insular Square ang Goldberry Suites sa iskor, 51-49 aron malikayan ang pagkatagak samtang nakatabla sab ang Dynamic Power human ilang gipukan ang Cebu Landmasters sa iskor, 59-50.
Nagkalisod sa sayo pa ang Insular Square tungod sa depensa nga gipatuman sa mas tag-as ug title-favorite nga Goldberry apan dihang misaler na sab ang ilang kaugalingong depensa, naka-apas sila og nalimitahan nila ang mga tirada sa Goldberry didto sa fourth period aron sila maka-ipsot.
Si Job Shan maoy nangu sa Insular Square sa iyang 15 puntos ug si Miko Datan midugang og 12 puntos. Sa laing bahin, miposa sab og 15 puntos si Dave Lim aron pangulohan ang Goldberry ug miamot si Jeremy Huang ug 13 puntos.
Nakatabla sab sa 1-1 nga baraha ang Dynamic Power dihang wala mapiog si Mark Sy sa fourth quarter kinsa mibahug og sagunson nuybe puntos sa iyang kinatibuk-ang 18 puntos aron pangulohan ang opensa sa iyang team.
Migamit sila'g man-to-man nga depensa ug maoy hinungdan nga nakahimo'g daghang turnovers ang Cebu Landmasters. Si Francis Ong ang misuporta kang Sy ug miabuno siya'g 12 puntos.
Ang Cebu Landmasters gipangulohan ni Kevin Villamor kinsa mihakot og 12 puntos apan igo lang siyang nakahimo'g sayis puntos sa fourth quarter ug ang laing sayis puntos gikan sa tulo ka quarters.
Midugang og otso puntos si Gino Reyes alang sa Cebu Landmasters.
Puntos matag usa:
First Game:
Insular Square (51)— Shan 15, Datan 12, Dizon 6, Gajudo 5, Cimafranca 4, Lagman 3, Bacaltos 3, Tuano 3
Goldberry (49)— Lim 15, Huang Je 13, Ting 5, Que 5, Borromeo 4, Uy 3, Tan 2
Second Game:
Dynamic Power (59)— Sy 18, Ong 12, Reoma 6, Lim 6, T. Tan 4, M. Tan 3, Ong 3, Go 3, Sia 1.
Cebu Landmasters (50)— Villamor 12, Reyes 8, Lopena 7, Mangubat 6, Te 5, Consunji 5, Oquias 3