CEBU, Philippines - Nanganti si WBO International flyweight champion Milan 'El Metodico' Melindo (27-0, 11KOs) nga mohimo'g surpresa alang sa iyang mga boxing fans atol unya sa pagdepensa sa iyang bakus batok ni Venezuelan Jean Piero Perez (19-4, 14KOs) sa main event sa "Pinoy Pride XVI: Venezuelan Invasion" karong Sabado diha sa Waterfront Cebu City Hotel and Casino.
Atol sa final press conference kagahapon didto sa Aegean Room sa Waterfront Hotel, kalma ug malipayon nga Melindo ang miatubang sa mga sakop sa media uban ang pagsalig nga modaog batok ni Perez.
Taliwala sa mga pangangkon ni Perez nga usa kini ka lisud nga kontra alang sa ALA boxer, si Melindo nagtuo nga sama sa mga miagi niyang gikasangka, molampos gihapon siya pagdispatsar sa bisitang boksidor, kinsa babag sa iyang dalan alang sa usa ka world title fight.
"I don’t care kun unsa iyahang (Perez) style. I will fight the way I fight and watch out kay naa koy surprise nga himoon karong Sabado para sa mga boxing fans," matud pa ni Melindo, kinsa misakmit sa WBO International belt pinaagi sa first round knockout nga kadaugan batok ni Colombian Jesus Geles niadtong Hunyo didto sa Resorts World Manila.
Daan nang nangangkon ang kampo ni Perez nga sama ni Melindo, usa usab ka ngilngig nga technical boxer ug counter-puncher ang ilang batos.
Hinuon, si ALA chief trainer Edito Villamor nagtuo nga dili kini makalabaw sa abilidad ni Melindo.
Mitug-an si Villamor, nga gawas sa talagsaong abilidad ni Melindo sa pagpalusot og kumo, ipabuhagay usab ang kusog sa iyang batos aron matumba si Perez.
Sa laing bahin, mibahad sab si Francisco Arroyo, ang trainer ni Perez nga mohimo og dakung upset ang iyang boksidor batok ni Melindo.
"My boxer trained very hard for this fight, and we came here to win," matud ni Arroyo.
Sama ni Melindo, misaad usab si Rocky 'The Road Warrior' Fuentes (33-6, 22KOs) nga iyang panalipdan sa ikalimang higayon ang iyang OPBF flyweight title batok sa Japan-based Korean slugger nga si Myung-Ho Lee (15-1, 5KOs).
Ang ALA rising star nga si Arthur 'El Matador' Villanueva (19-0, 12KOs), moaway sa labing unang langyaw'ng niyang kaatban nga si Pramuansak Posuwan (45-4, 24KOs) sa Thailand. (BANAT SPORTS)