CEBU, Philippines - "2 Heart to Beat - One Run, Two Lives" maoy tema sa usa ka charity run alang sa duha ka masuso nga bata, kinsa adunay depekto sa kasingkasing.
Gikatakda kini sa Oktubre 14 diha sa Cebu I.T. Park sa barangay Apas, ning siyudad.
Ang 2H2B Run usa ka fund raiser event alang ni baby Maven, ang walo pa lang ka bulan nga anak nilang Kristoffer Dominic ug Hannah Almira Amore ug baby Gabrielle, siyam ka bulan nga anak nilang Michael ug Joann Pearl Pacaña nga pulos adunay Tetralogy of Fallot (TOF), usa ka congenital heart defect.
Duha ka kategoriya ang piliang daganan sa mga partisipante ug kini mao ang 5K ug 3K.
Ganting salapi ug gift items ang madawat sa top finishers. Aduna kini registration fee nga P300 alang sa 3K ug P400 sa 5K run. Mahimong moparehistro sa Rudy Project ug Runnr sa Ayala Center-Cebu, Gold's Gym sa J. Centre Mall sa A.S. Fortuna st., Mandaue City ug sa NCR Cebu sa I.T. Park pinaagi ni Mike Pacaña ug Madz Niz.
Alang sa dugang pang mga pakisayod sa maong kalihukan, mahimong motawag ni race director Alex Escala sa 0922-7751-089 o e-mail sa esca@hotmail.com. (BANATS PORTS)