CEBU, Philippines - Mabaid pa ang kahait sa abilidad sa No. 1 team sa Cebu Schools Athletic Foundation Inc. (CESAFI) University of the Visayas (UV) Green Lancers sa ilang pakigsangka sa hiniusang puwersa sa PBA ug ABL sa usa ka tune-up match karong alas-4 sa hapon diha sa UV main gym.
Sa dili pa ang ilang sangka, magtigi una ang UV Baby Lancers ug ang UV Maritime Team sa alas-2:30 sa hapon. Ang Maritime maoy kampiyon atol sa ilang intramurals sa miaging tuig.
Ang kanhi PBA cagers nga si Bruce Dacia, moduwa sa PBA-ABL Selection uban nilang Stephen Padilla ug Jayford Rodriguez nga parehong produkto sa UV.
Lain pang moduwa uban sa bisitang koponan mao silang Rob Wainwright, Mark Andaya, Al Vergara, Jam Alfad, Ramsey Williams, Ken Bono, JR Gerilla, Jason Wade ug 6-foot-9 import nga si James Garnett sa France.
Ang UV Green Lancers ni coach ug ex-PBA star Felix 'Donbel' Belano, moparada nilang 6-foot-7 Nigerian Steve Cedrick Akomo, John Michael Abad, Francisco Arong, Andrew Avillanoza, Angelo Babia, Arvie Cabanero, Wowie Escosio, Luther Huevos, Vincent Mendoza, Phil Mercader, Rhaffy Octobre, Rene Jun Saycon, ug Jerome Silva. - BANAT NEWS