CEBU, Philippines - Padayonon karon ang aksiyon sa 17th Milo Little Olympics-Visayas leg diha sa Cebu City Sports Center (CCSC).
Suwayan sa perennial champion University of Cebu (UC) pagpalig-on sa ilang liderato sa high school division batok sa nagsunod nga University of San Carlos (USC)-BED ug University of the Visayas (UV)-main.
Sa unang semana, ang UC nakatigum og 90 puntos human sila midominar sa athletics, scrabble, football, gymnastics, sepak takraw, table tennis, taekwondo, tennis ug volleyball events. Ang USC mihipos og 77.8 puntos, samtang ang UV adunay 70 puntos.
Ang fourth ngadto sa 10th placers sa secondary level mao ang Abellana National School (67.3), Iloilo National High School (60), University of Southern Philippines Foundation (45), Sacred Heart School-Ateneo de Cebu (42.5), Cabancalan National High School (37), Southwestern University (26.5) ug Don Bosco Technology Center (26.3).
Sa elementary division, ang USC mao ang kasamtangang nag-una uban ang 70.5 puntos. Nagsunod alang sa ikaduha ang UV sa ilang 61.25 puntos ug ikatulo ang SHS-AdC nga adunay 39.45 puntos.
Mokompleto sa top 10 mao ang Cebu Institute of Technology-University (32.5 pts.), University of San Jose-Recoletos (30.5 pts.), Banilad Elementary School-Mandaue (30 pts.), Cebu City Central School (27 pts.), Talamban ES (26.25 pts.), Severo Duterte Memorial ES, Tejero ES ug Catmon ES (25 pts.) ug Pardo ES (23.7 pts.). - BANAT NEWS