CEBU, Philippines - Usa ka golden performance ang gihimo ni Cebu City Mayor Michael L. Rama human siya moburak og 50 puntos sa usa ka friendly match batok sa Saturday Club All-Star aron pangulohan ang iyang Team Rama ngadto sa 127-106 nga kadaugan sa miaging gabii didto sa barangay Quiot Proper open court.
Ang maong exhibition game maoy nagsilbing usa sa mga kalihokan isip lamas sa tinuig nga pangilin sa barangay Quiot ubos sa ilang patron nga si Sr. San Roque.
Ang Team Rama ubos ni playing coach Charlie Reyes, gipalig-onan nilang ex-PBA star Danny Aying ug kanhi USJR Jaguar enforcer Argiel Magan kinsa maoy nangu sa ilang opensa ug sayo silang nakadominar sa duwa dihang daan na silang milabaw og 11 puntos sa halftime, 55-44.
Bisan tuod og didto lang sa third period nakasulod si Mayor Rama tungod kay uwahi siyang miabot tungod sa kadaghan sa iyang mga imbitasyon, nakamaneho gihapon siya'g 50 puntos nga naglakip og 14 ka three-pointers.
Bisa'g gitusak-tusak ni Mayor Rama ang net sa Quiot, nakahimo gihapon sa pagsikit sa makadiyot ang Saturday Club All-Star didto sa third quarter ginamit ang mainitong 35-34 scoring run luyo sa triumvirates nilang ex-UC Webmaster pointguard Raymund Yncierto, Dindo Dela Peña ug Boboy Rosito apan kawang ang maong paningkamot tungod kay nagkadama nang daan og daghang puntos ang Team Rama aron dili na kini magukod.
Miabag kang Mayor Rama sa ilang opensa mao silang Aying ug Magan kinsa midugang og 20 ug 14 puntos matag usa.
Sa laing bahin, ang Saturday Club All-Star gipangulohan nilang Dindo Dela Peña, Boy Perez ug Dong Baguio kinsa pulos miposa og 16 puntos. Pulos sab miamot og double figures silang Yncierto, Rosito ug Dela Cerna kinsa nagkumboya og 38 puntos.
Puntos matag usa:
TEAM RAMA (127)- Rama 50, Aying 20, Magan 14, Miñoza 10, Babatid 7, C. Reyes 7, Aniñon 7, Abellana 5, Y. Reyes 4, Jueves 3.
SAT. CLUB (106)- D. Dela Peña 16, Baguio 16, Baguio 16, Perez 16, Dela Cerna
13, Yncierto 13, Rosito 12, Ruiz 7, Sumargo 7, Bacalso 6. (GGM) - BANAT NEWS