CEBU, Philippines - Usa ka eksplosibo ug mabulokong sangka sa basketball ang idalit karon sa mga basketball fanatics dihang himoon karong gabhiona ang gikahinaman ug dugay nang gipaabot nga engkwentro sa mga tang-an nga teams ang powerhouse University of the Visayas (UV) Green Lancers ug top contender Southwestern University (SWU) Cobras sa bugtong collegiate game sa nagpadayong 12th season sa Cebu Schools Athletic Foundation, Inc. (CESAFI) didto sa Cebu Coliseum.
Tinguha karon sa Lancers (5-0) nga haruson ang ilang six-game elimination round aron makuha ang unang pwesto ug mo-bye atol sa pagsugod sa semifinals diin ang nahibiling unom ka teams magbagat og usab alang sa placings.
Sa kasamtangan, ang Cobras (2-2) aduna pa'y nahibiling usa ka duwa batok sa University of San Carlos (USC) kinsa naghupot sab og 2-2 nga baraha ug kini mahulog nga dili lang usa ka prestige match apan usa ka krusyal nga sangka.
Ang mga beterano sa Lancers nga maoy seguradong maoy motimon sa team mao silang Jerome Silva, Eman Calo, Phil Mercader, John Michael Abad ug Rene Jun Saycon uban sa ilang 6'7 nga Nigerian import nga si Steve Cedrick Akomo, ang leader sa rebound ug blockshots.
Sa laing bahin, malaumon sab ang Cobras nga makasandig ug makakuha'g maayong opensa gikan sa ilang Cameroonian towers nga silang Benoit Mbala ug Justin Aboude uban kanilang monberty Arong, Jestoni Casquejo, Joseph Nalos, Benito Ortuyo ug ang pagbalik ni Bonifacio Guillena gikan sa iyang pulled muscle injury.
Sa mga sangka sa high school kagabii, naka-ipsot ang University of San Carlos (USC) Baby Warriors batok sa University of Cebu (UC) Junior Webmasters, 78-72 samtang parehong gipanglubong sa University of Southern Philippines Foundation (USPF) Baby Panthers ug sa defending champion UV Baby Lancers ang ilang tagsa-tagsa ka kaatbang.
Gilubong sa Baby Panthers ang walay daog nga Don Bosco Technology (DBTC) Junior Greywolves, 97-56 ug gilampurnas sa Baby Lancers ang mas gagmay nga University of San Jose Recoletos (USJR) Baby Jaguars, 91-49. - BANAT NEWS