CEBU, Philippines - Duha ka sakop sa Yaw-Yan ArDigma-Cebu Top Team ang mosulong didto sa Mindanao aron musangka sa Mindanao Ultimate Mixed Martial Arts' (MUMMA) “The Proving Ground – Warshock” fight card ugma sa gabii didto sa Liceo de Cagayan University Gym, Cagayan De Oro City.
Kini sila si Cebu-based British MMA fighter Cris ‘Lindol’ Thompson-Brooks ug Universal Reality Combat Championship (URCC) veteran Geronimo ‘Daredevil’ Etac kinsa tinguha nga mopadayon sa winning-streak sa maong MMA Team.
Atol sa Ground and Pound series niadtong Hulyo 14 didto sa Cebu Coliseum, unom usab ka mga sakop sa Cebu Top Team ang midaog batok sa tagsa-tagsa nila ka mga kaatbang.
Si Brooks moatubang ni Davaoeño grappler Gygz Ocampo sa Pythons' Pit Davao sa heavyweight division, samtang si Etac makigharong ni Muay-Thai expert Rabin Catalan sa Tricks MMA team Manila.
Uban nila ni Brooks ug Etac didto sa Cagayan De Oro mao ang founder sa Yaw-Yan ArDigma Cebu ug amahan sa Cebu Top Team nga si Master Benigno ‘Ekin’ Caniga Jr ug anak niini ug MMA international champion Johnlery Ian Caniga. - BANAT NEWS