CEBU, Philippines - Atubangon na ni ALA rising star Jason 'El Niño' Pagara (28-2, 17KOs) ang labing krusyal nga away sa iyang karera sa ilang "rematch" ni Mexican Rosbel 'Lobo' Montoya (36-4-1, 30KOs) sa main event sa "Pinoy Pride XV: Philippines vs. Mexico-The Rematch" karong gabii didto sa Waterfront Cebu City Hotel and Casino.
Gawas sa pagsakmit sa WBO International light welterweight title, gitug-an ni Pagara nga numero uno niyang laraw mao ang "panimawos" ngadto ni Montoya.
Si Montoya midaog pinaagi sa "unanimous decision" atol sa una nilang engkuwentro sa miaging tuig.
"Mao na gyud ni akong chance, akong buhaton ang tanan aron makabawos ko niya," matud pa ni Pagara atol sa official weigh-in kagahapon didto sa The Event Centre sa SM City-Cebu.
Atol sa weigh-in, sila si Pagara ug Montoya parehong mitimbang og 139.5 pounds.
Sa iyang bahin, ang trainer ni Pagara nga si Joseph Baldago mibutyag sa ilang game plan. Plano nila nga presyuron si Montoya sa dili pa nila kini rumbohon ang lawas ug ulo aron matumba.
"Naa gyu'y knockout ani," matud pa ni Baldago. "Makita ninyo nga lahi na si Jason aning awaya, nag-train siya og maayo aron mabuhat namo og tar'ng ang among game plan."
Sa supporting bout, ang undefeated ALA rising star nga si Genesis 'Azukal' Servania (18-0, 7KOs) mosuway pagtumba ni Mexican Jorge 'El Feroz' Pazos (21-3, 14KOs).
Ang duha magsangka alang sa WBO Asia-Pacific super bantamweight belt.
Mohimo usab sa iyang comeback fight si former two-division OPBF titlist Jimrex 'Executioner Jaca (34-5-3,19KOs) batok sa laing Mehikano nga si Angel 'Arcangel' Martinez (18-2-1, 13KOs), samtang ang manghod ni Jason nga si Albert Pagara (11-0, 9KOs) makigsinukliay og kumo batok ni Arvin Makiling (9-4,2KOs). - BANAT NEWS