CEBU, Philippines - Nangigo sa ilang outside shooting ang University of Cebu (UC) Junior Webmasters batok sa University of San Jose-Recoletos (USJ-R) Baby Jaguars aron moiskor og 89-61 nga kadaugan sa 12th Cebu Schools Athletic Foundation Inc. (CESAFI) basketball event kagahapon didto sa Cebu Coliseum.
Ning pagsuwat, padayon pa nga nagduwa ang defending champion UC Webmasters batok sa Southwestern University (SWU) Cobras.
Sayong nakalabaw og daku ang Junior Webmasters, 35-11 kay gawas sa pagpatuman sa ilang hugot nga depensa, puwerte usab nga nangigo sa ilang outside shooting. Miburot labaw ngadto sa 49-19 sa uwahing bahin sa second period.
Medyo mikagar ang mga tirada sa Junior Webmasters sa third period apan wala kini mahulga kay nakapundo kini og daku sa first half.
Dihang mihiyos ang ilang labaw ngadto sa 22 puntos, 57-79, mihimo’g platoon substitution si coach Reggie Licanda ug iyang gipulihan ang lima niya ka batos aron makapundo og kusog.
Si Virzon Orquez maoy nangu sa Junior Webmasters sa iyang 26 puntos, gisundan ni Andrey Armenion nga adunay 18 puntos.
Tulo sa Baby Jaguars ang mirehistro og double figures nga gipangulohan ni Sean Anthony Espiritu pinaagi sa iyang 18 puntos. Si Vince Winston Castro miiskor og 14 puntos ug si Cedric Areglado midugang og 11 puntos. - BANAT NEWS