CEBU, Philippines - Mobawos pinaagi sa knockout si kanhi WBO Asia Pacific Youth lightweight champion Jason 'El Niño' Pagara (28-2, 17KOs) batok sa Mehikanong si Rosbel 'Lobo' Montoya (36-4-1, 30KOs) sa main event sa "Pinoy Pride XV: Philippines vs. Mexico-The Rematch" karong Sabado sa gabii diha sa Waterfront Cebu City Hotel and Casino.
"100% ready na gyud ko para pildihon siya (Montoya),” matud pa ni Pagara atol sa final press conference kagahapon didto sa UNO Café sa Waterfront Hotel. "Paninguhaon nako nga ma-KO siya, nag-train ko og maayo para aning awaya. Gusto ko modaog pinaagi sa knockout," dugang pa sa 24-anyos nga si Pagara.
Masaligon si Pagara nga modaog na ning higayona batok ni Montoya, kinsa mipilde kaniya pinaagi sa "unanimous decision" sa una nilang sangka sa miaging tuig.
Sila si Pagara ug Montoya mag-ilog sa bakanteng WBO International light welterweight title.
Sa supporting bout, si undefeated ALA rising star Genesis 'Azukal' Servania (18-0, 7KOs) makigbinukbukay ni Jorge 'El Feroz' Pazos (21-3, 14KOs) alang sa WBO Asia-Pacific super bantamweight crown.
Ang former two-division OPBF champion nga si Jimrex 'The Executioner' Jaca (34-6-3, 19KOs) mohimo sa iyang comeback fight batok sa batan-on apan delikado nga Mexican boxer nga si Angel 'Arcangel' Martinez (18-2-1, 13KOs). - BANAT NEWS