Manila, Philippines - Nangibabaw ang host school St. Clare College sa AMA Computer University at Centro Escolar University laban sa City University of Pasay upang manatiling magkasalo sa liderato sa 12th NAASCU Basketball Championship noong Linggo sa Lumera Towers sa Manila.
Gumawa ng 36 puntos si Eugene Torres habang si Jeff Viernes ay may 26 para sa Saints na nag-init sa second period upang tuluyang hawakan ang kalamangan tungo sa 98-81 panalo.
Malakas ang panimula ng Titans nang layuan ng walo sa first period ang katunggali, 26-18, pero nanlamig ang koponan sa ikalawang canto at nakapagtala lamang ng 12 puntos.
Sa pangunguna nina Torres at Viernes ay gumawa ang Saints ng 23 puntos para angkinin ang 41-38 bentahe sa halftime.
Hindi na nagbago pa ang takbo ng opensa ng St. Clare para iwanan na ng tuluyan ang katunggali sa second half at hagipin ang ikatlong sunod na panalo.
Tinapatan ng CEU ang 3-0 karta ng St. Clare sa pamamagitan ng 103-66 demolisyon sa CUP.
May 13 puntos si Joran Martinez para sa balanseng pag-atake ng Scorpions na agad na iniwan ang Eagles, 31-16, sa unang yugto. ng labanan.
Samantala, umukit ng 98-80 tagumpay ang Our Lady of Fatima University laban sa Trace College sa isa pang seniors game.