CEBU, Philippines - Midaog dayon sa ilang unang duwa ang Sacred Heart School-Ateneo de Cebu (SHS-AdC) ug University of San Carlos (USC) sa pagbukas sa Milo-backed BEST SBP/Passerelle Twin Tournaments 2012 for Cebu niadtong Domingo didto sa SHS-AdC Gym sa Brgy. Canduman, Mandaue City.
Gikastigo sa back-to-back champion SHS-AdC ang Don Bosco Technology Center, 67-19, samtang gilatigo sab sa USC ang University of San Jose-Recoletos (USJ-R), 87-23 ubos sa Small Basketeers Philippines (SBP) division (Under 12).
Wala sab magpalupig ang University of the Visayas (UV) nga milubong sa Cebu Eastern College (CEC), 45-26.
Sa duwa ubos sa CYBL SBP Passerelle D-League, ang USC South/St. Arnold mikulit dayon og 3-0 nga baraha human nila gipilde ang USC North-C, 61-45, ang USC South/St. Joseph mimakmak sa USC North-B, 49-18 sa SBP division, samtang ang SHS-AdC-B midaog batok sa Don Bosco Magone, 35-26 ug ang Don Bosco Savio milampurnas sa NISSI Academy, 51-24.
Mikulit sa ilang ikatulong daog ang USC South dihang gilubong sa USC South-B. - BANAT NEWS