CEBU, Philippines - Usa ka sayon nga away ang pagabuhaton ni world title contender AJ 'Bazooka' Banal sa iyang pakigsangka ni Indonesian fighter Ruben Manakane karong gabii sa ALA Promotions ug Cobra Energy Drink ‘Tunay na Lakas Boxing’ didto sa Dumaguete City Quadrangle sa Dumaguete City.
Tungod kay wala pa mahapsay ang detalye alang sa giplanong world title fight alang kaniya, ang No. 1 bantamweight sa WBO nga si Banal mopahigayon una og eight round tune-up match batok ni Manakane.
Sa supporting bout, ang Sugbuanong si Joseph Von Minoza mosuway pagpilde sa taga-Liloan nga si RJ Ano-os sa usa ka 10 round non-title bout.
Mobanat usab ang duha ka undefeated prospects sa ALA Boxing Gym nga sila si Melvin Gumban ug Roma Rate. Si Gumban makigsangka ni Aroel Romasasa sa General Santos City, samtang si Rate makigharong ni Lyndel Radoc sa Dumaguete City.
Mokompleto sa fight card mao ang sangka nila ni Reymund Tabogon batok Lito Dante, Pedro Balaba batok Christian Saga, Rey Morales batok Ian Teves, ug Rolando Lingaolingao batok Steven Recaborda. (BANAT SPORTS)