CEBU, Philippines - Adunay gamay’ng kausaban sa rota sa umba sa umaabot nga Cobra Ironman 70.3 Philippines nga gikatakda sa Agosto 5 didto sa Shangri-la Mactan Island Resort sa Lapu-Lapu City.
Kini ang gibutyag ni race director Guy Concepcion atol sa labing ulahing weekly coordination meeting uban sa kagamhanan sa dakbayan sa Lapu-Lapu sa pagpangulo ni Mayor Paz Radaza.
Inay nga duha ka loops, ang 1.9 kilometer swim course himuon na lang nga usa ka loop.
Ang lumba sa langoy, nga maoy unang tigian sa mga partisipante, gitakda nga sugdan sa alas-6:15 sa buntag gikan sa Shangri-la paingon ngadto sa Movenpick, dayon sa Portofino ug balik sa Shangri-la.
Sa laing bahin, ang bike course, gikan sa Shangri-la paingon ngadto sa Talisay City agi sa Marcelo Fernan Bridge, Cebu International Convention Center, Plaza Independencia ug sa South Road Properties.
Ang katapusang tigian, ang running nga mokober og 21-km ilakip na sa running sud sa duha ka Robinson properties, Blue Coast ug Amisa sa Punta Engaño.
Sa iyang bahin, si Mayor Radaza mihatag na og kamandoan sa City Traffic Management Service aron higpiton ang pag-implementar sa pagpasira sa kadalanan nga maagian sa lumba aron malikayan ang mga aksidente ug gimandoan usab niya ang barangay captains pagtabang sa CTMS sa pag-implementar sa road closures.
Uban sa maong kasauban, gipatas-an usab ni Mayor Radaza ang numero sa well-wishers ug cheerers gikan sa 12 ngadto na sa 25 mil.
Ang cheerers langkuban sa mga tinun-an sa sekondarya ubos sa Departamento sa Edukasyon ug barangay folks. (BANAT SPORTS)