CEBU, Philippines - Dul-an na sa 3,000 ka mga runners ang nagparehistro alang sa 2nd DYAR Sonshine Radio Half Marathon nga gitakda karong Domingo diha sa The Terraces sa Ayala Center-Cebu.
Si William Valencia, ang Sonshine Radio officer-in-charge, mibutyag nga ilang gilauman nga moabot ngadto sa tres mil ka runners ang magginukdanay sa kadalanan sayo sa buntag sa adlaw'ng Domingo.
Usa sa rason sa nakita sa mga organizers sa daghang mga runners nga nagpalista mao ang pagdili nila paghatag og premyo sa mga Kenyan runners nga modaog sa lumba. Kini aron madasig ang mga local runners nga maninguha sa lumba.
Ning pagsulat, kapin na sa 300 runners ang nagparehistro sa 21K half marathon, samtang ang uban numero nabuak-buak ngadto sa 12K, 6K ug 3K fun run.
Moabot sa P50,000 nga ganting salapi ang giandam alang sa mga mananaog. Makadawat usab og specially-designed medal ang tanang finishers sa 21K half marathon.
Niadtong gustong magparehistro, ang registration fee nagkantidad og P600 sa 21K, P350 sa 12K ug P300 sa 6K ug 3K run.
Mahimong magparehistro diha sa Ayala Active Zone, Toby’s Sports sa SM City-Cebu, Wow Travel and More ug Cebu City Sports Center. (BANAT SPORTS)