CEBU, Philippines - Maglisud ang defending champion University of Cebu (UC) Webmasters pagdepensa sa ilang korona sa 12th season sa Cebu Schools Athletic Foundation, Inc. (CESAFI).
Kini tungod sa kakulang og players, ilabi na nga wala na ang ilang 6-foot-9 nga si June Mar Fajardo, apan malaumon gihapon silang moabante sa semifinals.
Tungod sa disqualification sa ilang duha ka players, 13 na lang ang moduwa sa UC karon nga season nga sugdan karong Hulyo 29 diha sa Cebu Coliseum.
Gani ang Webmasters team manager nga si Atty. Baldomero C. Estenzo dili makapasalig nga mahimong kampiyon pag-usab tungod kay nagpalig-on sab ang ubang teams ilabi na gyud ang runner-up nga Southwestern University (SWU) Cobras ug ang University of the Visayas (UV) Green Lancers.
Dili makaduwa ang gikuha nilang Fil-Arabian nga si Saeed Quintao kay nakaangkon og ACL tear (anterior cruciate ligament) atol sa ilang team practice. Ang taas sab nga sentro nga si Kirby Hans Cabrera wala ilakip sa listahan kay padayon kini sa iyang on-the-job-training (OJT) isip usa ka nursing, samtang gitagak sa team si Alfrancis Tamsi tungod sa kakuwang sa interes pagduwa sa team.
Tungod kay wala man sila’y lehitimong sentro, nanghinaut ang UC nga mosaler ang ilang mga tirada sa gawas ug moepekto ang ilang depensa.
Ang mga karaang players nga sakop sa championship team mao silang Quinton Brian Heruela, John Auditor, Benedict Ocariza ug si Robinson Mohammad. Nawala na sila Fajardo, Edward Pao, Gerald Ampoon ug Francis Luigi Bercede.
Mibalik sab sa line-up silang Pompeo Miranda III, Val Cueva, Arvin Kim Gomez ug Kevin Quilantang. Ang mga rookies nga gilaumang makatabang sa kampanya sa Webmasters mao ang bag-ong Fil-Ams nga silang Alejandro Asis Quedo Cabrera ug si Bennick Celana. (BANAT SPORTS)