MANILA, Philippines - Binanderahan nina Wilson Maningkil at Lany Cardona ang men’s at women’s 21-kilometer run, ayon sa pagkakasunod, sa second leg ng 36th National Milo Marathon sa Dagupan City na nilahukan ng 9,700 runners.
Nagsumite si Maningkil ng oras na 1:15:28 para maghari sa men’s division kasunod sina Ferdinand Corpuz (1:17:16), Jeric Buhian (1:22:21), Ronnie Rosete (1:23:01) at Rogel Anajao (1:24:32).
Bagama’t may minor injury ay naglista pa rin si Cardona ng oras na 1:38:58 para ibulsa ang P10,000 elimination prize.
Inungusan ni Cardo-na sina Angie Botardo (1:49:10), Jessa Mae Cortez (1:54:28), Jhocell Asis (2:03:59) at Maidy Soriano (2:30:25).
Makakasama nina Maningkil at Cardona ang 28 runners na pangungunahan nina Hernani Sore at Cristabel Martes, namayani sa unang qualifying race sa Baguio City noong nakaraang Linggo, at ang 11 pang qualifiers mula sa Dagupan leg sa National Finals sa Disyembre 9 sa SM Mall of Asia (MOA) grounds sa Pasay City.
Matapos ang Dagupan Leg, dadalhin ang qualifying race sa Tarlac sa Hulyo 15.
Ang 36th Milo Marathon National Finals ay nakatakda sa Disyembre 9 sa SM Mall of Asia.