T-Rex mihari sa Mr. Perfect Body competition

CEBU, Philippines - Mipatigbabaw si T. Rex Rodriguez sa 19 ka entrante ug gilangkat ang titulo sa 2012 Mr. Perfect Body bodybuilding competition niadtong Domingo sa hapon didto sa Pacific Mall Activity Centre (Super Metro) sa Mandaue City.

Si Mark Padillo maoy miangkon sa ikaduhang dapit, samtang si Franz Sidy Opsima mipahiluna sa ikatulo.

Gawas mga medalya ug tropeyo, si Rodriguez mibulsa sab og P5,000, samtang si Padilla nakadawat og P3,000 ug si Opsima adunay P2,000.

Nasakay sa top six placers mao sila si Gary Densing, Michael Ranises ug Jecil Labajo. Pulos sila nakadawat og ganting salapi ug medalya.

Ang mga hurado sa tinuig nga kompetisyon mao sila si Ben Andales (Mr. Philippines 1978), Welsey Lim (Mr. Philippines 1987), Henley Uy (licensed international bodybuilding judge), Noli Tolentino (Mr. Perfect Body 1987, Mr. Philippines 1990 ug Mr. Bikini Open 1991) ug Ely Delgig.

Sa dance marathon, sila si Edgar Campo Saducas ug Jelly Cabaral Hombrebueno maoy gikoronahan isip Zumbathon King and Queen 2012.  (BANAT SPORTS)

Show comments