CEBU, Philippines - Pasay City - Miabot na ang takna alang ni two-division world champion Donnie 'Ahas' Nietes (29-2, 16KOs) aron ipamatuod nga usa siya sa mga dekalibreng Pinoy world champion sa pagdepensa niya sa iyang bakus batok ni Mexican challenger Felipe Salguero (16-2, 11KOs) sa main event sa "Pinoy Pride 14: Night of Champions" karong gabii dinhi sa Resorts World Hotel and Casino.
Usa kini ka lisud nga tahas nga sagubangon ni Nietes batok ni Salguero, kinsa mipakita og dakung pagsalig sa iyang kaugalingon nga moilog sa bakus. Nahugyaw ang mga boxing fans ug media dihang misinyas nga sama sa nagilit sa iyang liog si Selguero ngadto ni Nietes.
"I came to knockout Nietes," matud pa ni Salguero. "Watch out because I will do a very big surprise in front of all Filipino boxing fans."
Bisan pa sa pagpanghulga ni Salguero, pabiling kalma si Nietes uban ang saad nga buhaton niya ang tanan aron madepensahan ang iyang WBO light flyweight title.
"Wa ra to nako ang iyang (Salguero) gibuhat pag-weigh in," matud pa ni Nietes atol sa official weigh-in kagahapon didto sa Robinson's Galleria sa Ortigas. "Andam nako, andam na akong gameplan ug buhaton nako tanan aron makahatag og impressive win."
Sa supporting bouts, duha ka undefeated ALA rising stars nga sila si Milan 'El Metodico' Melindo (26-0,10KOs) ug Genesis 'Azukal' Servania (17-0, 5KOs) ang mosuway pag-angkon og bakus batok sa tagsa-tagsa nila ka langyaw nga kaatbang.
Ang world title contender nga si Melindo moatubang ni former world champion Jesus Geles (13-2,5KOs) sa Columbia alang sa WBO International flyweight championship, samtang si Servania moharong ni three-time Mexican world title challenger Genaro 'Poblanito' Garcia (38-8, 22KOs) alang sa WBC international silver super bantamweight title. (BANAT SPORTS)