CEBU, Philippines - Usa ka talagsaong sangka ang mahitabo sa MMA fight card nga uloha'g "Ground and Pound VI: Invincible" tungod kay magtigi ang mga founders sa duha ka sikat nga fight clubs sa Sugbu sa Hulyo 14 diha sa Cebu Coliseum.
Sa usa ka special attraction nga giulohan og "Founder vs. Founder," ang pangulo sa Soma Kick Boxing Club nga si Allan 'The Dancing Man' Epile makigharong ni sensei Ben 'Durex Warrior' Torbiso sa Durex Dragon.
Bisan og mga edaran na, ipakita sa duha ka kanhi martial arts fighters nga aduna gihapon sila'y ikabuga ug maningkamot nga modaog alang sa dungog sa tagsa-tagsa nila ka fight club.
Sa iyang bahin, ang organizer nga si Yaw-Yan ArDigma VisMin Director Master Benigno 'Ekin' R. Caniga Jr. miplansa pa sa mga detalye sa maong fight card.
Gipahibalo ni Caniga nga ang duha ka British fighters nga sila si Ermar Alexander ug Cris Marvyn Thompson Brooks ubos sa Yaw-Yan ArDigma moaway batok sa tagsa-tagsa nila ka kaatbang. (BANAT SPORTS)