MANILA, Philippines - Bigyan ang sarili ng magandang pabaon patungo sa playoffs ang nais gawin ng AirAsia Philippine Patriots sa pagsagupa sa napatalsik na kampeon na Chang Thailand Slammers sa AirAsia ASEAN Basketball League (ABL) ngayon sa Thai-Japan Associaton Gym sa Bangkok, Thailand.
May 15-5 baraha ang Patriots at selyado na ang No. 2 seeding at homecourt advantage sa semifinals na paglalabanan sa best-of-three series.
Hindi pa matiyak kung sino sa Indonesia Warriors at Westports Malaysia Dragons ang makakatapat ng Patriots ngunit makakaasang hahataw pa rin ang koponang pag-aari nina Mikee Romero ng Harbour Centre at Tony Boy Cojuangco upang magkaroon ng momentum papasok sa playoffs.
“Mahalaga ang larong ito para sa amin dahil gusto naming pumasok sa semifinals galing sa panalo para ‘yung confidence level ng team mas mataas,” wika ni coach Glenn Capacio.
Nanalo ang Patriots sa huling laro sa Jobstreet.com Singapore Slingers, 90-84, at si Anthony Johnson ang bumandera sa laban sa kanyang 26 puntos, 20 rito ay isa huling yugto.
Ang Slammers ay nasa isang six-game losing streak para sa kanilang 5-15 baraha.
Huhugot si Capacio ng puntos kina Al Vergara at Aldrech Ramos upang may makatuwang sina Johnson, may iniiinda pa sa groin injury, at Nakeia Miller.